Штом ќе зажари неба источни
Сонце образ ми позлатува
Ко да праќаш ти тајни бакнежи
Место писма од далечина

А кога од збудалени ветрој западни
Брезите ќе се расчешлаат
Мислам дали пак негде, некогаш
Твоите коси ќе ме покријат?

Кај е север... Кај е југ
- ништо не го занима
Ова срце како компас расипан
Тебе само те покажува

Зад Радишани штрчат планини
Ноќе над нив ѕвезда најсилна
Ѕвездо северна, дал' е неверна
Ил' си само солза нејзина?

Пролет секоја птица некоја
В грло носи песни љубовни
И со твојот глас тагува за нас
Заедно што не сме јас и ти

Кај е север... Кај е југ
- ништо не го занима
Ова срце како компас расипан
Тебе само те покажува